Keshilla praktike per amvisat

Këshilla për përdorimin e vezëve
- Që të kuptoni nëse një vezë është e freskët, vini re lëvozhgën e saj. Lëvozhga e vezës së freskët nuk shkëlqen. Në të kundërt, pra nëse një vezë ka lëvozhgë të shkëlqyeshme me njolla, atëherë është bajate. Gjithashtu, mund të bëni edhe provën e mëposhtme. Hidhni një vezë në një legen me ujë. Sa më thellë të shkojë veza, aq më e freskët është. Nëse lundron, kjo do të thotë që veza është mjaft e vjetër.
- Nëse ngatërruat vezët e ziera me ato të paziera, bëni këtë provë. Rrotullojeni vezën: nëse veza merr xhiro të shpejta, atëherë është e zier. Veza e pazier nuk rrotullohet.
- Që të mos ju thyhen lëvozhgat e vezëve gjatë zierjes, shtoni në ujin ku i zieni pak kripë ose pak uthull. Një mënyrë tjetër për t’i ruajtur të pathyera gjatë zierjes, është t’ua lyeni lëvozhgën me limon ose ti shponi me një gjilpërë para se ti zieni.
- Vezët qërohen më lehtë nëse pas zierjes i lini për 10 minuta në një enë me ujë të nxehtë ose të ftohtë, me kapak të mbyllur.
- Gjatë ngjyrosjes së vezëve të Pashkës, hidhni pak uthull në tenxheren me bojë. Në këtë mënyrë vezët do të ngjyrosen më mirë. 
Këshilla për përdorimin e kripës
- Që ta ruani kripën nga lagështira, hidhni në kripore disa kokrra orizi. Orizi ka aftësinë të thithë lagështinë.
- Parapëlqehet që kripja e mishrave dhe e peshqve të bëhet në fillim të gatimit. Ndërsa kripja e bimëve bishtajore (për shembull: fasule, thjerrëza, bathë etj.) bëhet në fund, në mënyrë që të mos forcohen. Gjithashtu, në fund bëhet edhe kripja e oktapodit.
- Nëse harruat t’u hidhni kripë qofteve, veproni si më poshtë. Pas skuqjes lërini të ftohen dhe lagini me pak ujë me kripë. Futini për disa minuta në furrë të nxehtë dhe rezultati do të jetë njëlloj sikur t’i kishit kripur që në fillim.
- Nëse ju ra në gjellë më tepër kripë se sa duhet, atëherë mund të hidhni në gjellën që zien një patate mesatare. Patatja ka aftësinë të thithë kripën e tepërt. Nëse nuk ju gjenden patate, hidhni në gjellë pak lëng limoni ose 1 lugë kafeje sheqer.
Këshilla të përgjithshme
- Për ta ruajtur bukën të freskët, mbajeni në ngrirje të frigoriferit. Kur ta nxirrni, do të shikoni se ka mbetur e freskët, sikur ta keni blerë atë ditë.
- Që të mos ju forcohen bërxollat gjatë skuqjes, veproni në këtë mënyrë: grini në rende një qepë të madhe dhe para se ti skuqni bërxollat, mbulojeni sipërfaqen e tyre me këtë shtresë qepe të grirë. Lërini për 2–3 orë. Në vazhdim, skuqini. Rezultati do t’ju lërë gojëhapur!
- Që të shmangni lotët gjatë pastrimit të qepëve, mund t’i lini ato të ndara në ngrirje të frigoriferit ose në ujë të ftohtë. Më pas pastrojini.
- Që ta ruani gjalpin sa më të freskët, hidhni brenda tij një copë karotë të pastruar.
- Mielli ruhet i freskët më gjatë, nëse e mbani në frigorifer.
- Nëse dëshironi t’i hiqni supës së përgatitur yndyrën e tepërt, vendoseni në frigorifer. Yndyra e ngrirë do të mblidhet në sipërfaqe. Në këtë mënyrë do të mund ta hiqni më lehtë.
- Nëse dëshironi ta ruani peshkun sa më të freskët, vendoseni në një enë me ujë të ftohtë; më pas futeni në ngrirje.
Për amvisat e reja
Sa mirë dini t’i përgatitni kafetë?
Përgatitja e kafesë shqiptare, me kajmakun dhe aromën e saj karakteristike, si dhe arritja e analogjisë së duhur të sheqerit dhe kafesë, është me të vërtetë art. Më poshtë po japim recetat kryesore të përgatitjes së kafesë, të cilat do t’ju vijnë në ndihmë kryesisht amvisave të reja.
 
Kafe e ëmbël e rëndë
Nevojiten:
1 lugë e vogël kafe
1 ½ lugë e vogël me sheqer
1 filxhan i vogël me ujë
Përgatitja
1. Në një xhezve (ibrik) hidhni ujin, kafenë, sheqerin dhe përziejini.
2. Lëreni kafen të ziejë derisa të fryhet dhe të krijojë kajmak, por jo të marrë valë.
Kafe e mesme e zier
Nevojiten:
1 lugë e vogël kafe
1 lugë e vogël sheqer
1 filxhan i vogël ujë
Përgatitja:
1. Në një xhezve hidhni ujin, kafenë dhe sheqerin.
2. Përziejini dhe lëreni kafen të ziejë derisa të marrë valë në mënyrë që ta presë kajmakun.
Kafe franceze
Kafeja franceze quhet ndryshe edhe kafe filtri dhe përgatitet në makineri të posaçme. Duhet të përdoret gjithmonë e sapobluar. Mund të shërbehet me krem shantiji (kafeja vienoisse), me një masë uiski (Irish coffee) ose me një masë brandy (kafe Royal). Duhet konsumuar e freskët, ndryshe e humbet aromën dhe shijen.
Kafe me aromë speciale
1 litër kafe filtri të nxehtë
1 lugë e vogël me karafil
 2 shkop kanelle
½ filxhan brandy
2–3 lugë supe sheqer
1 gotëz pije liker portokalli
lëkura e grirë e 2 portokajve dhe 1 limoni
I përziejmë të gjithë përbërësit dhe e lënë masën për disa minuta. Më pas e shërbejmë.
Kafe me qumësht
Nevojiten:
1 filxhan me qumësht
1 lugë e vogël kafe
2 lugë të vogla sheqer
Mënyra e parë
1. Në një xhezve zieni qumështin dhe shtoni kafenë.
2. Pasi kafja të jetë tretur dhe të ketë marrë dy valë, hiqeni nga zjarri.
3. Pasi ta lini kafenë të kullojë pak, hidheni në filxhan dhe shërbejeni.
Mënyra e dytë
1. Zieni qumështin dhe hidheni në filxhan.
2. Shtoni kafenë dhe sheqerin.
3. Shërbejeni menjëherë.
Kafe çasti (nescafe)
Nevojiten:
1 filxhan uji i nxehtë
1 lugë e vogël ose 1 zarf kafe çasti
1–2 lugë sheqer
Përgatitja
1. Hidhni një lugë ujë të nxehtë në një filxhan të posaçëm ose kupë (më e madhe se filxhani i kafesë dhe më e vogël se filxhani i çajit).
2. Shtoni menjëherë në të kafenë, sheqerin (sa të keni dëshirë) dhe përziejini mirë me lugë. Shtoni ujë të nxehtë.
Këtë lloj kafe mund ta pini shqeto, me qumësht (të freskët apo të kondensuar) ose me krem